جلسات التأمل VS جلسات التنويم الإيحائي
بسبب تداخل استخدام مفهوم التنويم الإيحائي للإشارة لجلسات التأمل ، كان لازم أقولكم عن الفرق بين الاتنين مع تنبيه مبكر إني منحاز بطبيعة دراستي للتنويم الإيحائي .
والتداخل ده حصل لما بدأ يتم استخدام مفهوم "التنويم الإيحائي" ك موضة جديدة للإشارة لقوة المحتوى المقدم أو جلسة التأمل المُسجلة ..
كل الناس تقدر تكتب جلسات تأمل ، وتسجلها كمان وتنشرها ك جلسة تأمل تساعد في كذا كذا ، لكن المتخصصين فقط والدارسين للتنويم الإيحائي هما اللي يقدروا يكتبوا جلسة تنويم إيحائي .. ليه بقى ؟
أولا : الاقتراحات
التنويم الإيحائي مكون من عناصر أساسية منها "الاقتراحات" ، وعلشان تكتب اقتراح سليم فانت بتمر على حوالي ٧ قواعد لكتابة اقتراح تنويم إيحائي يخفف من المقاومة النفسية للاقتراح وديه أول حاجة بيقع فيها ناس كتير ..
فنية اقتراحات التنويم الإيحائي هي تجنبها لمقاومة المستمع / المستفيد ، سواء عن طريق تكوين الاقتراح نفسه أو تمهيد تلقينه للمستفيد . يعني إيه ؟
مثال مشهور : ١- انت واثق من نفسك
في المثال ده ، انت بتثير مقاومة المستمع للاقتراح لإنه يعرف عن نفسه معلومة معاكسة ومختلفة عن لو قولتله مثال : لإنك قدرت انك تعمل / توصل لكذا كذا فانت ثقتك في نفسك حتى لو كانت مش ظاهرة بشكل كامل جواك فهي يوم بعد يوم وساعة بعد ساعة بتبدأ تظهر أكتر وأكتر "مثلا"
فجلسات التأمل هي جلسات تحفيزية ، مثيرة للمقاومة لإن طبيعي إن الشخص يكون كاتبها من بنات أفكاره أو واخدها من ال ai بدون تعديل أو ترتيب أو هيكلة .
ثانيا: ال induction
الأغلبية فاكرين إن الاسترخاء هو أساسي في التنويم الإيحائي وانزل سلم وشوف جنينة ونام عالسرير الخ ، ومع ان ده في التنويم الإيحائي اسمه progressive induction
ولكنه نادرا ما بيتم استخدامه ، لكن جلسات التأمل غالبا بتركز بشدة على الاسترخاء على عكس جلسات التنويم الإيحائي ..
في التنويم الإيحائي أنا ممكن أدخلك في تنويم بطريقة مختلفة تماما مبنية على اثارة الحواس وتكاملها بأقل قدر ممكن من الاسترخاء الجسدي وفي حقيقة الأمر ده في حد ذاته بيخلي الجلسة فعالة أكتر وهقولك مثال سريع (ملحوظة مش بستخدمه باستمرار في الجلسات المسجلة)
حتى وانت سامعني تقدر تشوفني ، تقدر تشوفني مبتسم ، تقدر تشوفني وأنا قاعد ، أو واقف، تقدر تكون هنا وهناك ، تقدر تسمح لجسمك إنه يسترخي وتقدر تسمح لتنفسك إنه يكون أعمق (سكوت) أو أسرع (سكوت) أو تقدر تقاوم اقتراحاتي وتتنفس بعمق بالطريقة اللي هتحققلك انت الاسترخاء ..
الجملة اللي فاتت ديه مفيهاش انزل سلم وضاعف استرخاءك ، فيها ارباك وعي ، فيها انفصال، فيها تحفيز على المقاومة اللي بتنتهي بالفشل ومنه للاستسلام للحالة .. طبعا الكلام بيكون مختلف، أطول من كده ، مختلف عن كده بس في النهاية هنا طريقة التواصل مع العقل في التنويم الإيحائي مختلفة عن استراتيجيات جلسات التأمل .
ثالثا : المدارس النفسية
ناخد جلسة ل هيبنوڤايبس زي مثلا جلسة "الصورة الأولى للحب: التحرر من أثر علاقة الوالدين"
الجلسة ديه واحدة من عشرات الجلسات في هيبنوڤايبس والمبنية على مصادر ، مش مكتوبة بشكل اعتباطي ارتجالي ما . ميزة التنويم الإيحائي هنا انه بيحول النظريات النفسية لتقنية فنية تقدر بشكل جزئي إنها تحول الكلام والابحاث لتقنيات نفسية جوا جلسة التنويم الإيحائي نفسها .
فتلاقي جلسة فيها سايكو دراما ، جلسة بتستخدم ال imagery rescripting ، جلسة بتستخدم ال EMDR ، جلسة بتستخدم العلاج السلوكي المعرفي (زي جلسة توليد السلوك الجديد الشهيرة) . وبتتبني حوالين المدرسة العلاجية جلسة التنويم الإيحائي . وفي جلسة "التحرر من أثر علاقة الوالدين" فمصادرها :
- Davies & Cummings — Emotional security hypothesis: أساس فهم أثر خبرة العلاقة بين الوالدين والصورة الداخلية المتكوّنة عنها.
- Arnoud Arntz — Imagery Rescripting, 2025: إعادة تشكيل الخبرة المتخيَّلة لتلبية الاحتياج وتحديث المعنى، مع التمييز بين الوقائع والخيال.
- ASGPP — What is Psychodrama?: إطار الفعل الدرامي الموجّه وأدوار المخرج والمشاركين؛ التسجيل الحالي يستلهم بعض مبادئه ولا يحل محل تطبيقه الفردي أو الجماعي.
ومن المصادر بتتبني الفكرة والاقتراحات والنص وخلافه .
وده اللي بيخلي جلسة التنويم الإيحائي الواحدة هي عبارة عن رحلة علاجية مش مجرد رحلة صوت راويها حلو وكلامها لطيف . هي رحلة مبنية على مصادر تقدر انت كمعالج نفسي تتحقق منها بنفسك لما تقرا نص الجلسة أو تسمعها.
وده اللي بيخلي متخصصين نفسيين كتير يتجهوا للتنويم الإيحائي في تقنياتهم وجلساتهم ؟ ليه ؟ ببساطة لإنه بيساعدهم يطبقوا النظري عملي جوا جلسة التنويم الإيحائي .
تقنية مثلا زي ال empty chair في الجيشتالت (أو الجيشطالط في بعض الأماكن)، مكنتش هتتشهر لولا استخدام التنويم الإيحائي ليها ودمجها في جلسة من جلساته .
وأخيرا .. التنويم الإيحائي في المسلسلات (طالع نازل) أو الأفلام أو غيره ده دمه خفيف وصدقني ياريت كان ممكن كنت انا شخصيا هكون مبسوط بس ليس هكذا يُدار العالم.
هل ده معناه ان جلسات التأمل وحشة؟ بالعكس هي لذيذة ، تنفع ليوم رايق ، لوقت ضيق شوية لكن تشبيه جلسات التنويم الإيحائي العلاجية بيها فده غير صحيح .
أفضل ناس يقدروا يعملوا جلسات تنويم إيحائي هما متدربيني وهتغر بيهم للأبد، الناس ديه دارسة جلسات النص التطويري والبروتوكولات والفنيات وفاهمين الكلام ده . عارفين ان الموضوع مش موضوع نوم وإن الدنيا أعمق من كده.
ولأ أنا معنديش خطط حالية لتدريب التنويم الإيحائي جماهيراً زي زمان وتركيزي بقى فردي.
خلال أيام كل جلسة من جلسات تطبيق هيبنوڤايبس المكتوبة مؤخرا هيبقى فيها قسم "زاوية نفسية" .. هتعرفك انت بتسمع ايه وهتحترم عقلك مش هتقولك بس انت غمض عينك واسمع . انت هتبقى فاهم انت بتسمع ايه .
ويومكم أجمل من يومي
نهاد رجب